Самарқандда болаларга ноқонуний диний таълим бериб келган шахс ушланди

7 кўришлар

Самарқанд вилоятида ҳуқуқни муҳофаза қилиш органлари томонидан ноқонуний диний таълим фаолияти билан шуғулланган шахс қўлга олинди. Маълум бўлишича, Фарғона вилоятидан келган 35 ёшли эркак Ургут туманида яширин ҳужра ташкил этиб, унда болаларга диний таълим бериб келган.

Аниқланишича, ушбу шахсда диний таълим бериш учун махсус рухсатнома ва тегишли диний маълумот бўлмаган. У 10 ёшдан 15 ёшгача бўлган етти нафар вояга етмаган болага ноқонуний равишда дарс ўтган. Ҳозирда мазкур ҳолат юзасидан жиноий иш қўзғатилган ва тергов ҳаракатлари олиб борилмоқда.

Ўзбекистон Республикаси қонунчилигига мувофиқ, диний таълим фаолияти билан фақатгина диний ташкилотларнинг рўйхатдан ўтган муассасаларида, тегишли лицензияга эга бўлган шахслар томонидан шуғулланиш мумкин. Ноқонуний диний таълим бериш ҳолатлари қонун билан таъқиқланади ва жавобгарликка сабаб бўлади.

Мазкур ҳолат юзасидан тергов якунларига кўра, айбланувчига нисбатан қонуний чоралар кўрилади. Ҳуқуқни муҳофаза қилувчи органлар бу каби ноқонуний фаолиятга қарши курашни давом эттиради ва фуқароларни бундай ҳолатлар ҳақида хабар беришга чақиради.

Манба: Gazeta.uz